Сакрыстыя працуе: 8:00 – 20:00 Тэл.: 8 017 200-44-15

Пошта: chyrvony@tut.by Мы ў сацыяльных сетках:         

XXXI Звычайная нядзеля, Год С

ПЕРШАЕ ЧЫТАННЕ Мдр 11, 22 — 12, 2
Ты літуешся над усімі, бо любіш усё, што існуе

Чытанне кнігі Мудрасці Саламона.

Пане,
Увесь свет перад Табою, як ваганне шаляў
або як кропля ранішняй расы, якая выпадае на зямлю.
Але Ты літуешся над усімі, бо ўсё можаш
і не зважаеш на грахі людзей, каб яны маглі навярнуцца.
Бо любіш Ты ўсё, што існуе,
і нічым, што стварыў, не грэбуеш;
бо, калі б нешта ненавідзеў,
гэтага б Ты не стварыў.
Як бы магло трываць што-небудзь,
калі б Ты не захацеў?
Ці як захавалася б тое, што не было паклікана Табою?
Але Ты ўсё шкадуеш, бо яно Тваё,
о Пане, які любіш жыццё.
Нятленны дух Твой ёсць ва ўсім.
Таму Ты паступова паказваеш памылкі тым, хто ўпаў,
нагадваеш ім, у чым яны грашаць, і навучаеш,
каб яны пакінулі зло і паверылі ў Цябе, Пане.

Гэта слова Божае.

РЭСПАНСАРЫЙНЫ ПСАЛЬМ Пс 145 (144), 1–2. 8–9. 10–11. 13cd–14 (Р.: пар. 1)

Рэфрэн: Буду Цябе славіць, Бог і Валадар мой.

1. Буду ўзвялічваць Цябе, Бог і Валадар мой, *
і благаслаўляць імя Тваё навекі.
2. Кожны дзень благаслаўляць Цябе буду *
і ўсхваляць імя Тваё на вякі вечныя.

Рэфрэн:

8. Пан міласэрны і ласкавы, *
доўгацярплівы і шматміласцівы.
9. Пан добры да ўсіх, *
і міласэрнасць Яго над усімі стварэннямі Ягонымі.

Рэфрэн:

10. Няхай славяць Цябе, Пане, усе Твае стварэнні, *
і ўсе святыя Твае благаслаўляюць Цябе.
11. Няхай апавядаюць пра славу Твайго Валадарства *
і магутнасць Тваю абвяшчаюць.

Рэфрэн:

13. Пан верны ва ўсіх сваіх словах *
і святы ва ўсіх сваіх справах.
14. Пан падтрымлівае ўсіх, хто падае, *
і падымае ўсіх прыгнечаных.

Рэфрэн:

ДРУГОЕ ЧЫТАННЕ 2 Тэс 1, 11 — 2, 2
Каб праславілася імя Пана ў вас, і вы ў Ім

Чытанне Другога паслання святога апостала Паўла да Тэсаланікійцаў.

Браты:

Мы заўсёды молімся за вас, каб наш Бог прызнаў вас годнымі паклікання і выканаў усякую добрую волю і справу веры ў моцы, каб праславілася імя нашага Пана Езуса ў вас, і вы ў Ім, паводле ласкі Бога нашага і Пана Езуса Хрыста.

Просім вас, браты, адносна прыйсця нашага Пана Езуса Хрыста і нашай сустрэчы з Ім: не спяшайцеся губляць раўнавагу ці бянтэжыцца ні з-за духа, ні з-за слова, ні з-за паслання, якое нібыта ад нас, што нібы ўжо надыходзіць дзень Пана.

Гэта слова Божае.

СПЕЎ ПЕРАД ЕВАНГЕЛЛЕМ Ян 3, 16

Акламацыя: Аллелюя, аллелюя, аллелюя.

Так палюбіў Бог свет, што аддаў Сына свайго Адзінароднага,
каб кожны, хто верыць у Яго, меў жыццё вечнае.

Акламацыя: Аллелюя, аллелюя, аллелюя.

ЕВАНГЕЛЛЕ Лк 19, 1–10
Сын Чалавечы прыйшоў знайсці і выратаваць тое, што загінула

+ Чытанне святога Евангелля паводле Лукі.

У той час:

Езус увайшоў у Ерыхон і праходзіў праз яго. І вось адзін чалавек па імені Закхей, кіраўнік мытнікаў і багаты, стараўся ўбачыць Езуса, хто Ён такі, але не мог з-за натоўпу, таму што быў малога росту. Забегшы наперад, ён залез на смакоўніцу, каб убачыць Яго, бо Ён павінен быў там праходзіць.

Калі Езус прыйшоў на гэтае месца, паглядзеў уверх і сказаў яму: Закхей, хутчэй спускайся, бо сёння мне трэба быць у тваім доме.

Той хутка спусціўся і прыняў Яго з радасцю.

А ўсе, убачыўшы гэта, пачалі наракаць і казалі, што Ён зайшоў пагасціць да грэшнага чалавека. Закхей жа ўстаў і сказаў Пану: Вось палову маёмасці сваёй, Пане, я аддам убогім і, калі каго ў чым ашукаў, аддам у чатыры разы больш.

Езус сказаў яму: Сёння прыйшло збаўленне ў дом гэты, таму што і ён сын Абрагама. Бо Сын Чалавечы прыйшоў знайсці і выратаваць тое, што загінула.

Гэта слова Пана.

Меткі: Нядзеля, беатыфікацыя

Друкаваць

  • Дабрачынная акцыя “Светлае Свята Вялікадня”

    Згодна з добрай традыцыяй, моладзь Чырвонага касцёла зноў запрашае вернікаў далучыцца да дабрачыннай акцыі “Светлае Свята Вялікадня”, якая будзе дзейнічаць на працягу ўсяго Вялікага посту. Падчас яе кожны з удзельнікаў можа стварыць арыгінальную паштоўку, цудоўную вербачку альбо іншы велікодны падарунак.

  • Тыдзень беларускай мовы ў Чырвоным касцёле

    Бібліятэка імя Адама Міцкевіча запрашае на Тыдзень беларускай мовы і літаратуры, прысвечаны Міжнароднаму дню роднай мовы, яці пройдзе ў касцёле з 17 па 23 лютага.

  • Люты
    2020

    Тэатр Зніч

  • Адкрыццё фотавыставы

    Запрашаем на адкрыццё фотавыставы "Мир дикой природы" Клуба фатографаў дзікай прыроды Беларусі, які аб'ядноўвае каля 30 майстроў. Выстава адбудзецца 19 студзеня ў 12.00 ў Белай зале Чырвонага касцёла.

  • Студзень
    2020

    Тэатр Зніч

  • Адкрыццё фотавыставы
    Запрашаем на адкрыццё фотавыставы Ірэны Гудзіеўскай "Сімвалы Беларусі", якое адбудзецца 15 снежня а 12 гадзіне ў Белай зале.