Сакрыстыя працуе: 8:00 – 20:00 Тэл.: 8 017 200-44-15

Пошта: chyrvony@tut.by Мы ў сацыяльных сетках:      

Чаму трэба хадзіць на святую Імшу ў нядзелю? З катэхезы Папы Рымскага

13 снежня падчас агульнай аўдыенцыі ў ватыканскай Зале Паўла VI папа Францішак прысвяціў сваё разважанне сэнсу нядзельнай Эўхарыстыі.

 Пантыфік нагадаў, што яна дае хрысціянам магчымасць сустрэчы з Богам, умацавання Яго словам і адчування сябе Касцёлам, Яго містычным Целам.

«Што гэта за нядзеля для хрысціяніна без сустрэчы з Панам? З самага пачатку гэта зразумелі вучні Езуса, якія цэлебравалі Эўхарыстычную Сустрэчу з Панам у дзень, які яўрэі называлі “першым днём тыдня”, а рымляне “днём сонца”. У гэты дзень Езус уваскрос і аб’явіўся вучням, размаўляючы з імі, спажываючы з імі ежу, дорачы ім Святога Духа.

Таксама вялікае спасланне Святога Духа адбылося ў нядзелю, на пяцідзясяты дзень пасля ўваскрасення Езуса. Таму менавіта нядзеля — гэта святы дзень для нас, асвечаны эўхарыстычнай цэлебрацыяй, жывой прысутнасцю Пана паміж намі і для нас. Менавіта святая Імша робіць нядзелю хрысціянскай!» — сказаў Папа.

«Некаторыя грамадствы згубілі хрысціянскі сэнс нядзелі. Гэта грэх»

Пантыфік падкрэсліў, што каталіцкія супольнасці, які не маюць магчымасці ўдзелу ў святой Імшы кожную нядзелю, «пакліканы ў гэты святы дзень сабрацца на малітве ў імя Пана, слухаючы Божае слова і захоўваючы моцным жаданне Эўхарыстыі».

«Некаторыя секулярызаваныя грамадствы згубілі хрысціянскі сэнс нядзелі, асвечанай Эўхарыстыяй. Гэта грэх. У іх неабходна ажывіць гэту свядомасць, аднавіць значэнне свята — не губляць значэння свята, — значэнне радасці, парафіяльнай супольнасці, салідарнасці, адпачынку, які ўмацоўвае душу і цела.

Настаўніцай усіх гэтых каштоўнасцяў з’яўляецца Эўхарыстыя, з нядзелі ў нядзелю. Таму Другі Ватыканскі Сабор пажадаў сцвердзіць, што “нядзеля – гэта першасны святочны дзень, і яго трэба так падкрэсліваць і прадстаўляць пабожнасці вернікаў, каб ён стаў таксама днём радасці і адпачынку ад працы», — працытаваў Папа саборную Канстытуцыю аб літургіі Sacrosanctum Concilium.

Пантыфік заўважыў, што існаванне нядзелі як вольнага ад працы дня з’яўляецца плёнам распаўсюджвання хрысціянства.

Юдэі адпачывалі ў суботу, а ў рымскім грамадстве ўвогуле не было прадугледжана спецыяльнага дня для ўстрымання ад рабскай працы.

«Без Хрыста мы асуджаны на прыгнёт штодзённай стомленасцю. Нядзельная сустрэча з Панам дае нам сілы, каб жыць сёння з даверам і адвагай і крочыць наперад з надзеяй», — падкрэсліў Папа.

Што адказваць тым, хто кажа, што святая Імша не важная?

«Што можам адказаць тым, хто кажа, што не важна хадзіць на святую Імшу, нават у нядзелю, а толькі важна быць добрымі, любіць бліжняга? Гэта праўда, што якасць хрысціянскага жыцця вымяраецца здольнасцю любіць, як казаў Езус: “Па гэтым усе пазнаюць, што вы Мае вучні, калі будзеце мець любоў адзін да аднаго” (Ян 13, 35); але як можам практыкаваць Евангелле, не чэрпаючы, з нядзелі ў нядзелю, неабходныя для гэтага сілы з невычэрпнай крыніцы Эўхарыстыі?

Мы не ідзём на святую Імшу, каб даць штосьці Богу, але каб атрымаць ад Яго тое, у чым па-сапраўднаму маем патрэбу», — адзначыў Пантыфік.

Святы Айцец падкрэсліў, што католікі павінны ўдзельнічаць у нядзельнай святой Імшы, паколькі толькі дзякуючы ласцы Езуса людзі могуць спаўняць Яго запаведзі і быць, такім чынам, Яго пераканаўчымі сведкамі.

Паводле catholic.by
Са спасылкай на  Беларускую рэдакцыю
Ватыканскага радыё

Меткі: Пантыфік

  • Люты
    2018

    Тэатр Зніч

  • Студзень
    2018

    Тэатр Зніч

  • У Мінску пройдзе малітоўна-музычная сустрэча, прысвечаная памяці Адама Міцкевіча

    Штогод 24 снежня ля помніка Адаму Міцкевічу ў Мінску ў аднайменным скверы праходзяць «Калядныя сустрэчы», прысвечаныя памяці паэта і патрыёта сваёй Айчыны, які нарадзіўся менавіта ў гэты дзень. Сёлета таксама да ўдзелу ў імпрэзе запрашаюцца ўсе жадаючыя.

  • У чаканні Божага прыйсця...

    Моладзь Чырвонага касцёла прапануе ўсім ахвотным далучыцца да дабрачыннай акцыі “Калядная паштоўка”. На працягу Адвэнту з панядзелка па пятніцу пасля св. Імшы а 19 гадзіне збіраецца творчая група, каб сваімі рукамі ствараць віншавальныя паштоўкі да свята Божага Нараджэння. Сродкі ад іх рэалізацыі будуць скіраваныя на падтрымку дзіцячага дома ў Смалявічах.

  • Расклад начных чуванняў у мінскім Чырвоным касцёле на 2017-2018 гг.

    У парафіі Св. Сымона і Св. Алены (Чырвоны касцёл) ад кастрычніка да мая кожную першую суботу месяца будуць праходзіць начныя чуванні, прысвечаныя перапрашэнню Найсвяцейшага Сэрца Езуса і Беззаганнага Сэрца Марыі.

  • У архідыяцэзіі завяршаецца перэгрынацыя фігуры Маці Божай Фацімскай (+праграма)

    15 кастрычніка фігура Маці Божай Фацімскай вернецца ў мінскую архікатэдру — святыню, з якой год таму 16 кастрычніка распачыналася яе перэгрынацыя па парафіях архідыяцэзіі.