Сакрыстыя працуе: 8:00 – 20:00 Тэл.: 8 017 200-44-15

Пошта: chyrvony@tut.by Мы ў сацыяльных сетках:      

Душпастырская каляда: як падрыхтавацца да візіту святара?

У перыяд Божага Нараджэння і пасля святаў у кожнай парафіі адбываецца душпастырскае наведванне сем’яў — так званая каляда. Аб чым трэба памятаць, рыхтуючыся да яе?

Каляда — гэта перш за ўсё падзяка Богу за атрыманыя ласкі ў мінулым годзе і малітва аб апецы ў наступным, а таксама магчымасць асабістага знаёмства са святаром. У Каталіцкім Касцёле да душпастырскага візіту абавязвае кананічнае права, якое прадпісвае наведванне сем’яў для пашырэння веры і аказання неабходнай духоўнай дапамогі.

Як адбываецца «калядаванне святара»?

Для таго, каб дадзеная рэлігійная падзея прайшла належным чынам, неабходна стварыць адпаведныя ўмовы: засцяліць стол белым абрусам, на якім будуць знаходзіцца крыж, свечка, асвячоная вада і крапідла.

Асаблівасцю душпастырскай сустрэчы з’яўляецца тое, што ў ёй павінна ўдзельнічаць уся сям’я (і толькі адна). Таму сям'я абавязана даведацца, у які дзень і ў якую гадзіну святар наведае дом, каб усе члены сям’і маглі ў гэты час быць дома.

Важна запрасіць святара менавіта з той парафіі, да якой сям'я належыць тэрытарыяльна. Гэта будзе выхоўваць пачуццё адказнасці за сваю парафіяльную супольнасць, за яе будучыню.

Фігура Найсвяцейшай Панны Марыі

Напачатку гаспадар дома павінен прывітаць святара і пазнаёміць яго з тымі членамі сям’і, якіх ён не ведае. Пастырскае наведванне мае характар хатняга набажэнства. Яно можа распачынацца з абраду благаслаўлення сям’і разам з супольнаю малітвай і разважаннем над Божым словам.

Часам наведванне распачынаецца са спеву калядкі, якую разам з сям’ёй спявае і святар. Вітаючыся словамі «Спакой гэтаму дому», святар жадае, каб у гэтым доме пастаянна прысутнічаў Хрыстус, які сваім з’яўленнем на свет прынёс людзям спакой. Пасля гэтага прывітання адбываецца благаслаўленне ўсёй сям’і і дома з акрапленнем усіх прысутных асвячонаю вадою.

Са святаром стараюцца сустрэцца ўсе члены сям’і. Гэта добры час для прыватных размоваў са святаром, падчас якіх у хатняй атмасферы можна пачуць адказы на хвалюючыя пытанні.

Пасля адбываецца супольная малітва і асвячэнне пакояў. Візіт святара доўжыцца самае большае паўгадзіны.

Адкуль пайшла традыцыя каляды?

У старажытным Рыме святочнае наведванне «календэ» (callandae) адбывалася ў першыя дні студзеня, ад чаго ў еўрапейскіх мовах з’явілася слова «каляндар».

Вядома таксама, што ад слова «каляда», якое на нашу тэрыторыю прыйшло праз пасрэдніцтва чэхаў і палякаў, паходзіць і назва вясёлых песняў — «калядак». Калядкі спяваюцца на праслаўленне вялікай падзеі — Нараджэння Хрыстовага.

Фігура Найсвяцейшай Панны Марыі

Гэтыя песні з’явіліся яшчэ ў дні зараджэння хрысціянства, але толькі ў славянскіх народаў яны атрымалі сваю назву.

Касцёл пераняў народны звычай калядавання, аб’яднаўшы яго з благаслаўленнем дамоў ва ўрачыстаць Аб’яўлення Пана.

Паколькі ў гэты дзень немагчыма наведаць усіх жадаючых, наведванне расцягваецца на паслясвяточны час. Заходняя традыцыя, а таксама ўжо і наша, раіць пісаць на дзвярах дамоў, кватэр асвячанаю крэйдаю літары «С+М+В» + год.

Гэтыя першыя літары з лацінскага выразу: «Christus mansionem benedicat» («Няхай Хрыстус благаславіць дом»), а таксама першыя літары імёнаў трох мудрацоў. Цяпер візіт святара азначае не толькі благаслаўленне дома, але і сустрэчу пастыра з вернікамі.

Якой можа быць сума ахвяравання?

Традыцыйна сем’і, якія наведвае святар, складаюць сваё ахвяраванне. Наколькі вялікім яно павінна быць? Адказ просты: кожны ахвяруе, колькі можа.

Сабраныя сродкі могуць пайсці не толькі на патрэбы парафіі і святара, але і на патрэбы сем’яў парафіі, якія сапраўды чакаюць дапамогі: калі, напрыклад, адзін з членаў сям’і мае залежнасць і ад яго пакутуюць усе родныя; калі дзіця выхоўваецца толькі адным з бацькоў або бабуляю і дзядулем; калі ёсць моцна або невылечна хворы член сям’і, калі сям’я шматдзетная і працуе адзін з бацькоў.

Святар павінен усё ведаць і занатоўваць, каб быць падрыхтаваным да размовы з тымі, хто жыве без шлюбу, без споведзі або нават неахрышчаны, а таксама каб пасля пастырскага наведвання даць «падарунак» святога Мікалая тым, хто вельмі гэтага чакае.


Паводле catholic.by

Меткі: Каляда

  • Май
    2018

    Тэатр Зніч

  • Пілігрымка

    8 красавіка 2018 г. (у нядзелю Божай Міласэрнасці) адбудзецца пілігрымка з удзелам у Святой Імшы ў касцёле Божай Міласэрнасці ў Гродна.

  • Красавік
    2018

    Тэатр Зніч

  • Учынак міласэрнасці альбо як дапамагчы блізкаму чалавеку

    Моладзь касцёла святога Сымона і святой Алены (Чырвоны касцёл) запрашае вернікаў далучыцца да дабрачыннай акцыі “Светлае Свята Вялікадня”, якая будзе дзейнічаць на працягу ўсяго Вялікага посту. Падчас яе кожны з удзельнікаў можа стварыць арыгінальную паштоўку, цудоўную вербачку альбо іншы велікодны падарунак.

  • Фотавыстава

    Фотавыстава Уладзіслава Цыдзіка "Бачу Беларусь такой"

  • Тыдзень беларускай мовы ў Чырвоным касцёле

    Запрашаем на тыдзень беларускай мовы, які адбудзецца 21 – 25 лютага 2018 г. у бібліятэцы імя Адама Міцкевіча Чырвонага касцёла.