Пілігрымка ў Будслаў (ліпень 2024г.)

05 Ліпень 2024 Катэгорыя: Навіны

Дзённік пілігрымаў....

2 лiпеня 2024 г.

Дарагія вернікі, сёння (2 ліпеня) ва Ўрачыстасць Маці Божай Будслаўскай у дарогу да Будслава вырушыла посная пілігрымка на чале з ксяндзом-пробашчам нашай парафіі Уладзіславам Завальнюком. Сёлета мы, адчуваем асаблівае адзінства, бо нас яднае галоўная інтэнцыя: мы ўсе прагнем той хвіліны, калі дзверы касцёла Святых Сымона і Алены ізноў адкрыюцца, каб прыняць вернікаў. Заахвочваем далучацца да нашай малітвы, а калі хто захоча, то яшчэ не позна далучыцца і да паста. Да сустрэчы ў Будславе.

3 лiпеня 2024 г.

Удзельнікі поснай пілігрымкі шлюць вітанні з блаславёных сцежак нашай Бацькаўшчыны. Другі дзень у дарозе да Будслава. Святая імша на ганку гасцінных гаспадароў, якія прытулілі мінулай ноччу ўсіх пілігрымаў. Гадзінкі ў гонар Багародзіцы з птушыным рэхам ў лесе. Сунічны водар… Цсссс. Суніцы абмінаем. Вернемся па іх пасля.

Спяваем навэну з вяночкаў да Божай Міласэрнасці. І так ідзем услед за сонцам, а яно ўжо схіляецца да вечара.

Час малітвы і спакою ўзбоч дарогі. Тут цішыня і няма ніякіх машын. Услухоўваемся ў цішыню ўнутры нас. «Гасанна!» – спяваюць камары. Яны лятуць з намі, а пакуль збіраюць сваю пілігрымку з усяго лесу.

Наперадзе яшчэ даволі вялікі шлях, а ў Будславе чакае наша Маці, што прыспешвае ход…

Ксёндз-пробашч дае кожнаму патрымаць у руках ружанец, дзе ёсць адзінаццаць пацерак з ружанца Слугі Божага Эдварда Вайніловіча. Далей ідзем пад аповед пра Божы провід і сапраўды цудоўныя падзеі, якія напаўняюць жыццё, калі яно на хвалу Божую.

Спадзяемся на добры шлях у наступныя дні.

Да спаткання ў Будславе!