“Вы святую веру захавалі…”: Чырвоны касцёл адзначыў 108-ю гадавіну пасвячэння
25 лістапада 2018 г. у касцёле Святога Сымона і Святой Алены ў бібліятэцы імя Адама Міцкевіча адбылася ўрачыстая імпрэза, прысвечаная гістарычнай даце – асвячэнню касцёла 108 гадоў таму.
На сустрэчы прысутныя мелі гонар вітаць шаноўнага біскупа Казіміра Велікасельца, які меў прамову і ўдзяліў благаславенства.
Падчас вечарыны выступілі прадстаўнікі мінскага літаратурна-музычнага аб’яднання “Галактыка”: кіраўнік, паэтэса Кацярына Мяшкова, мастацкі кіраўнік, спявачка і пісьменніца Ірына Цуканава, намеснік кіраўніка, музыка і паэт Афанасій Бацяноўскі; навукоўцы, паэты і пісьменнікі, сябры бібліятэкі імя Адама Міцкевіча, удзельнікі дзіцячай артстудыі “Неспадзянка” і удзельнікі музычнай групы медыцынскай палоніі Мінска і Мінскай вобласці пры нашым касцёле.
Прысутныя прагледзелі фільм пра Чырвоны касцёл, ушанавалі памяць святароў, якія ў розныя часы працавалі ў касцёле, праслухалі вершы і песні пра нашу любімую святыню, прагледзелі слайды пра падзеі, якія адбываюцца зараз: рэканструкцыя касцёла, адліццё званоў (звон Алімпіі, Сымона і Алены; звон Слугі Божага Эдварда Вайніловіча і звон Арханёла Міхала) і іх усталяванне на вежах касцёла 9 кастрычніка гэтага года.
Галіна Івуць
Фота Міхаіла Крыжаноўскага
Меткі: Бібліятэка, бп. Казімір Велікаселец OP