Літургічны хор "Голас Душы"

Хор Голас Душы

Літургічны хор “Голас душы” касцёла св. Сымона і св. Алены быў заснаваны ў 1989 годзе па задуме кс. пробашча Уладыслава Завальнюка. Напачатку хор быў жаночым – удзельніцамі хору з’яўляліся студэнткі розных навучальных устаноў г. Мінска, сёння – гэта змешаны хор, большасць удзельнікаў якога маюць музычную адукацыю, а некаторыя з’яўляюцца прафесійнымі вакалістамі. Асаблівую ўвагу хор надае падрыхтоўцы выканаўцаў, імкнучыся да прафесійнага ўзроўню.

Апрача ўдзелу ў літургіі, хор “Голас душы” вядзе актыўнае духоўнае жыццё, удзельнічае ў рэкалекцыях, пілігрымках, розных духоўных і свецкіх творчых сустрэчах. Дзякуючы гэтаму, ён развіваецца не толькі на парафіяльным узроўні, але і з’яўляецца пастаянным удзельнікам канцэртаў, міжнародных конкурсаў і фестываляў у Беларусі і за яе межамі.

Калектыў гастраляваў з канцэртамі ў Латвіі, Польшчы, Літве, Украіне, а таксама ў розных гарадах і вёсках Беларусі. У Мінску хор “Голас душы” шмат разоў выступаў як ў Вялікай, так і Малой залах Беларускай дзяржаўнай філармоніі, у канцэртнай зале “Мінск”, на малой сцэне Палаца Рэспублікі, у клубе імя Дзяржынскага, у Тэатры эстрады.

Найбольш значныя дасягненні хору:

Першая прэмія на ІІІ Міжнародным фестывалі духоўнай музыкі “Łapskie Te Deum” (г. Лапы, Польшча, 2000);
Першая прэмія на VІІІ Міжнародным фестывалі “Магутны Божа” (г. Магілёў, Беларусь, 2000);
Першая прэмія і Гран-пры на ІV Міжнародным фестывалі духоўнай музыкі “Łapskie Te Deum” (г. Лапы, Польшча, 2001);
Сярэбраны дыплом і спецыяльная ўнагарода ад Галоўнага ўпраўлення Польскага аб’яднання хароў і аркестраў на Міжнародным конкурсе духоўнай музыкі “Legnica Cantat 43” (г. Лягніца, Польшча, 2012);
Гран-пры на ІV Міжнародным конкурсе калядных песнапенняў (г. Баранавічы, Беларусь, 2012);
Першая прэмія на V Міжнародным конкурсе калядных песнапенняў (г. Бэндзін, Польша, 2013).

А таксама хор “Голас душы” прымаў удзел:

у фестывалі “Noce kościołów” (г. Вроцлаў, Польшча, 2010);
у філармоніі, падчас дзён, прысвечаных Папе Яну Паўлу ІІ (г. Вінніца, Украіна);
у святочных набажэнствах, прысвечаных Маці Божай (г. Аглона, Латвія і г. Бердычаў, Украіна);
быў адным з арганізатараў і прымаў удзел у юбілейным вечары, прысвечаным 80-годдзю беларускага паэта Рыгора Барадуліна, на сцэне Беларускай дзяржаўнай філармоніі;
у культурнай праграме “Еўрапейскія масты”, падчас якой, сумесна з Дзяржаўнай акадэмічнай харавой капэлай імя Р. Шырмы і хорам Мінскага Свята-Духава Кафедральнага сабора выконваў “Рэквіем” В.А. Моцарта;

Калектыў супрацоўнічае з многімі беларускімі пісьменнікамі, сярод якіх Васіль Жуковіч, Мар’ян Дукса, Сяргей Законнікаў, Рыгор Барадулін і інш. Беларускія кампазітары, якія пішуць свае творы менавіта для гэтага калектыву, – Алена Абрамовіч, Аліна Безенсон, Г. Смоляк і інш.

У рэпертуары хору гучаць творы старадаўніх кампазітараў-класікаў (Дж. Пергалезі, А.Вівальдзі, Г.Ф. Гендэль, І.С.Бах, В.А.Моцарт і інш.), а таксама творы сучасных кампазітараў Беларусі, Украіны, Расіі, Балгарыі, Польшчы, Латвіі. Выконваюцца творы на мовах арыгіналаў.

Кіраўнік хору (рэгент) – кандыдат педагагічных навук, дацэнт кафедры харавога і вакальнага мастацтва Беларускага дзяржаўнага ўніверсітэту культуры і мастацтваў Таццяна Гажэўская.

Хормайстар – Алена Абрамовіч

Арганісты – Алена Абрамовіч, Калініка Мядзведзева.

Рэпетыцыі хору адбываюцца:

Пн, Ср – 19:00-21:00
Нд – 11:00

Хор “Голас душы” выпусціў некалькі дыскаў з выкананнем свайго рэпертуару. Гэта зборнік калядных песняў; песні, прысвечаныя Божай міласэрнасці; класічныя духоўныя песні на лацінскай мове. Дыскі хора можна набыць у нашым касцёле.

Канцэрты хора “Голас душы” у Чырвоным касцёле заўсёды можна пачуць на Божае Нараджэнне, на свята Божай Міласэрнасці, на Пасху і г.д. Інфармацыя аб бліжэйшых датах і месцах правядзення канцэртаў перыядычна будзе публікавацца на старонках парафіяльнага сайта.