Сакрыстыя працуе: 8:00 – 20:00 Тэл.: 8 017 200-44-15

Пошта: chyrvony@tut.by Мы ў сацыяльных сетках:      

Вялікі чацвер (Імша Хрызма)

ПЕРШАЕ ЧЫТАННЕ Іс 61, 1–3а. 6а. 8b–9
Пан намасціў мяне абвяшчаць добрую навіну ўбогім і даць ім алей радасці замест суму

Чытанне кнігі прарока Ісаі.

Дух Пана Бога на мне,
бо Пан намасціў мяне
абвяшчаць добрую навіну ўбогім.
Паслаў мяне перавязваць раны змучаных сэрцаў,
прапаведаваць вызваленне палонным
і вязням — свабоду;
абвяшчаць год ласкі Пана
і дзень помсты нашага Бога;
каб суцяшаць усіх засмучаных,
каб развесяліць тых, хто плача на Сіёне,
каб даць ім вянок замест попелу,
алей радасці замест суму,
вопратку хвалы замест духа маркоты.
Вы ж будзеце названыя святарамі Пана,
скажуць пра вас: яны слугі Бога нашага.
Так кажа Пан: Аддам ім узнагароду паводле вернасці
і заключу з імі вечны запавет.
Іх патомства будзе вядомым сярод народаў,
і паміж плямёнамі — іх нашчадкі.
Кожны, хто іх убачыць,
пазнае, што яны — патомствам, якое Пан благаславіў.

Гэта слова Божае.

РЭСПАНСАРЫЙНЫ ПСАЛЬМ Пс 89 (88), 21–22. 25 і 27 (Р.: пар. 2а)

Рэфрэн:  Буду славіць вечна міласэрнасць Пана.

21. Знайшоў Давіда, слугу Майго, *
Я намасціў яго Маім святым алеем,
22. Рука моцы Маёй заўсёды будзе з ім, *
і плячо Маё яго падтрымае.

Рэфрэн:

25. З ім Мая вернасць і ласка, *
у Маім імені ўзвялічана яго моц.
27. Ён будзе клікаць Мяне: Ты мой Айцец, *
мой Бог і збаўлення майго скала.

Рэфрэн:

ДРУГОЕ ЧЫТАННЕ Ап 1, 5–8
Учыніў нас валадарствам, святарамі для Бога і Айца

Чытанне кнігі Апакаліпсіса святога апостала Яна.

Ласка вам і спакой ад Езуса Хрыста, вернага сведкі, першароднага сярод памерлых і першага сярод зямных валадароў.

Таму, хто любіць нас і хто праз сваю кроў вызваліў нас ад нашых грахоў, і ўчыніў нас валадарствам, святарамі для Бога і Айца свайго, Яму хвала і моц на векі вечныя. Амэн.

Вось Ён прыходзіць з аблокамі, і кожнае вока ўбачыць Яго і ўсе тыя, хто Яго працяў. І будуць аплакваць Яго ўсе пакаленні зямлі. Так, амэн.

Я — Альфа і Амега, — кажа Пан Бог, –— які ёсць, які быў і які прыходзіць, Усемагутны.

Гэта слова Божае.

СПЕЎ ПЕРАД ЕВАНГЕЛЛЕМ Іс 61, 1 (цыт. у: Лк 4, 18)

Акламацыя: Хвала Табе, Валадар вякоў.

Дух Пана Бога на мне,
бо Пан намасціў мяне
абвяшчаць добрую навіну ўбогім.

Акламацыя: Хвала Табе, Валадар вякоў.

ЕВАНГЕЛЛЕ Лк 4, 16–21
Дух Пана на Мне; бо Ён намасціў Мяне

+ Чытанне cвятога Евангелля паводле Лукі.

У той час:

Прыйшоў Езус у Назарэт, дзе быў выхаваны, і ўвайшоў паводле свайго звычаю ў дзень суботні ў сінагогу, і ўстаў, каб чытаць. І падалі Яму кнігу прарока Ісаі. Ён, разгарнуўшы кнігу, трапіў на месца, дзе было напісана: Дух Пана на Мне;
бо Ён намасціў Мяне
абвяшчаць добрую навіну ўбогім,
паслаў Мяне абвяшчаць вызваленне палонным
і сляпым вяртаць зрок,
каб выпусціць спакутаваных на свабоду,
каб абвясціць год ласкі Пана.

І, закрыўшы кнігу, Ён аддаў яе слузе і сеў. І вочы ўсіх у сінагозе былі скіраваныя на Яго. І Ён пачаў гаварыць ім: Сёння споўніліся гэтыя словы Пісання, якія вы чулі.

Гэта слова Пана

Паводле catholic.by

Меткі: Разважанні, Лекцыянарый, Слова Божае, Чацвер

Друкаваць

  • МАЙ
    2017

    Тэатр Зніч

  • Учынак міласэрнасці альбо як дапамагчы блізкаму чалавеку

    Моладзь касцёла святога Сымона і святой Алены (Чырвоны касцёл) запрашае вернікаў далучыцца да дабрачыннай акцыі “Светлае Свята Вялікадня”, якая будзе дзейнічаць на працягу ўсяго Вялікага посту. Падчас яе кожны з удзельнікаў можа стварыць арыгінальную паштоўку, цудоўную вербачку альбо іншы велікодны падарунак.

  • КРАСАВІК
    2017

    Тэатр Зніч

  • «Горад Францішка Скарыны вачыма мастакоў»: у Чырвоным касцёле адкрыецца выстава ў гонар першадрукара

    Адкрыццё выставы пройдзе ў дольным касцёле Чырвонага касцёла перад святам святых Кірыла і Мятода, апекуноў Еўропы, якое ў Каталіцкім Касцёле адзначаецца 14 лютага.

  • Канікулы з Богам

    Запрашаем дзетак з 7 да 12 год на Канікулы з Богам у цэнтры CARITAS у Ляскоўцы

  • Шукаем памочнікаў

    Кожны з вучняў Хрыста пакліканы да евангелізацыі. Святы айцец Францішак вельмі часта ўзгадывае аб гэтым ў сваіх прамовах і казаннях. Ён асабіста з вялікай інтэнсіўнасцю імкнецца рэалізаваць гэта. Нават у капліцы Дома св. Марты кожны дзень кажа імправізаваныя пропаведзі.