Сакрыстыя працуе: 8:00 – 20:00 Тэл.: 8 017 200-44-15

Пошта: chyrvony@tut.by Мы ў сацыяльных сетках:      

Панядзелак — урачыстасць святога Юзафа

ПЕРШАЕ ЧЫТАННЕ 2 Сам 7, 4–5а. 12–14а. 16
Дасць Яму Пан Бог трон Давіда, бацькі Ягонага

Чытанне Другой кнігі Самуэля.

У тыя дні:

Пан скіраваў да Натана наступныя словы: Ідзі і скажы слузе Майму Давіду: так кажа Пан: Калі ж скончацца твае дні і ты спачнеш з бацькамі сваімі, тады я абуджу пасля цябе патомка твайго, які выйдзе з улоння твайго, і ўмацую ягонае валадарства. Ён збудуе дом Майму імені, а Я ўмацую трон яго панавання навекі. Я буду яму Айцом, а ён будзе Мне сынам.

І будзе непахісным дом твой і валадарства тваё навекі перад абліччам Маім, і трон твой будзе ўмацаваны навекі.

Гэта слова Божае.

РЭСПАНСАРЫЙНЫ ПСАЛЬМ Пс 89 (88), 2–3, 4–5. 27 і 29 (Р.: 37а)

Рэфрэн: Яго патомства будзе трываць вечна.

2. Міласэрнасць Пана буду ўсхваляць вечна, †
з пакалення ў пакаленне буду абвяшчаць *
вернасць Тваю вуснамі маімі.
3. Бо сказаў: Навекі заснавана будзе міласэрнасць, *
на нябёсах умацуеш вернасць сваю.

Рэфрэн:

4. Я заключыў запавет з выбраным Маім, *
прысягнуў Давіду, слузе Майму:
5. Навекі ўмацую патомства тваё *
і трон твой устанаўлю з пакалення ў пакаленне.

Рэфрэн:

27. Ён будзе клікаць Мяне: Ты мой Айцец, *
мой Бог і скала збаўлення майго.
29. Навекі захаваю для яго Маю міласэрнасць, *
і будзе непахісным запавет Мой з ім.

Рэфрэн:

ДРУГОЕ ЧЫТАННЕ Рым 4, 13. 16–18. 22
Насуперак надзеі, паверыў з надзеяй

Чытанне Паслання святога апостала Паўла да Рымлянаў.

Браты:

Абяцанне Абрагаму і патомству ягонаму, што ён будзе спадкаемцам свету, было дадзена не Законам, але праз справядлівасць веры. А праз веру, каб яно было дарам ласкі, каб яно было пэўным для ўсяго патомства. Не толькі для тых, хто абапіраецца на Закон, але і для тых, хто трымаецца веры Абрагама, які ёсць айцом усіх нас — як напісана: Я паставіў цябе айцом многіх народаў – перад абліччам Бога, якому ён паверыў як таму, хто ажыўляе мёртвых і кліча да існавання тое, чаго не існуе. Абрагам, насуперак надзеі, паверыў з надзеяй, што стане айцом многіх народаў, паводле сказанага: Такое будзе патомства тваё.

Таму гэта і залічана яму як справядлівасць.

Гэта слова Божае.

СПЕЎ ПЕРАД ЕВАНГЕЛЛЕМ Пс 84 (83), 5

Акламацыя: Хвала Табе, Слова Божае.

Шчаслівыя, хто жыве ў доме Тваім, Пане,
яны будуць праслаўляць Цябе вечна.

Акламацыя: Хвала Табе, Слова Божае.

ЕВАНГЕЛЛЕ Мц 1, 16. 18–21. 24а
Юзаф зрабіў, як загадаў яму анёл Пана

+ Чытанне святога Евангелля паводле Мацвея.

Якуб быў бацькам Юзафа, мужа Марыі, ад якой нарадзіўся Езус, званы Хрыстом.

Такім было нараджэнне Езуса Хрыста: пасля заручынаў Маці Ягонай Марыі з Юзафам, перш чым пачалі жыць разам, яна зачала ад Духа Святога. Юзаф жа, муж яе, будучы справядлівым і не хочучы зняславіць, хацеў патаемна адпусціць Яе.

Калі ён надумаў гэта, вось анёл Пана з’явіўся яму ў сне і сказаў: Юзэфе, сыне Давіда, не бойся прыняць Марыю, жонку тваю, бо зачатае ў ёй ёсць ад Духа Святога. Яна ж народзіць Сына, і дасі Яму імя Езус, бо Ён збавіць народ свой ад ягоных грахоў.

Абудзіўшыся ад сну, Юзаф зрабіў, як загадаў яму анёл Пана, і прыняў жонку сваю.

Гэта слова Пана.

Паводле catholic.by


Разважанне да Евангелля: Маўклівы святы

Мы так мала ведаем аб тым, хто стаў зямным апекуном Езуса. Апрача вельмі кароткіх згадак, Евангелле паслядоўна маўчыць аб ім. Зрэшты, ён сам таксама маўчыць. Аднак нават з гэтых некалькі вельмі кароткіх фрагментаў вылучаецца вобраз чалавека, які цалкам услухваецца ў Божы голас. Азначэннем яго паставы могуць быць словы: “Зрабіў, як загадаў яму анёл Пана”. Ажыццявіў Божае слова. Гэты маўклівы святы з’яўляецца прыкладам поўнай паслухмянасці Богу. А ён не меў простага задання. Рызыкнуў усім тым, што для ізраэльцянаў было важнае: сям’я і гонар. Аднак Юзаф паверыў Богу і дзякуючы гэтаму атрымаў для выканання адзіную ў сваім родзе місію ў дзеях збаўлення: стаў апекуном Езуса, свайго Збаўцы.

Пане Езу, няхай прыклад св. Юзафа вучыць нас, як прымаць Тваю волю ў нашым жыцці і ажыццяўляць скіраванае да нас слова.

Разважанні а. Даніэля Стабрылы OSB і а. Міхала Легана OSPPE, “Евангелле 2017”
Пераклад разважання: Кацярына Дурко

Меткі: Разважанні, Лекцыянарый, Слова Божае, Святыя, Урачыстасць

Друкаваць

  • МАЙ
    2017

    Тэатр Зніч

  • Учынак міласэрнасці альбо як дапамагчы блізкаму чалавеку

    Моладзь касцёла святога Сымона і святой Алены (Чырвоны касцёл) запрашае вернікаў далучыцца да дабрачыннай акцыі “Светлае Свята Вялікадня”, якая будзе дзейнічаць на працягу ўсяго Вялікага посту. Падчас яе кожны з удзельнікаў можа стварыць арыгінальную паштоўку, цудоўную вербачку альбо іншы велікодны падарунак.

  • КРАСАВІК
    2017

    Тэатр Зніч

  • «Горад Францішка Скарыны вачыма мастакоў»: у Чырвоным касцёле адкрыецца выстава ў гонар першадрукара

    Адкрыццё выставы пройдзе ў дольным касцёле Чырвонага касцёла перад святам святых Кірыла і Мятода, апекуноў Еўропы, якое ў Каталіцкім Касцёле адзначаецца 14 лютага.

  • Канікулы з Богам

    Запрашаем дзетак з 7 да 12 год на Канікулы з Богам у цэнтры CARITAS у Ляскоўцы

  • Шукаем памочнікаў

    Кожны з вучняў Хрыста пакліканы да евангелізацыі. Святы айцец Францішак вельмі часта ўзгадывае аб гэтым ў сваіх прамовах і казаннях. Ён асабіста з вялікай інтэнсіўнасцю імкнецца рэалізаваць гэта. Нават у капліцы Дома св. Марты кожны дзень кажа імправізаваныя пропаведзі.